عآپ نے مہاراشٹر میں اپنی تمام کمیٹیوں کو کیا تحلیل

ممبئی: عام آدمی پارٹی (عآپ) نے مہاراشٹر ریاستی کمیٹی اور ریاست کی علاقائی کمیٹیوں کو تحلیل کر دیا ہے۔ عآپ کے مہاراشٹر کے شریک انچارج گوپال اٹالیہ نے ایک پریس کانفرنس میں کہا کہ عآپ آئندہ مہاراشٹر اسمبلی انتخابات پوری طاقت کے ساتھ لڑنا چاہتی ہے اور اس کے لئے پارٹی زمینی سطح پر ایک بڑی تنظیم بنانا چاہتی ہے۔ اس لیے پہلے قدم کے طور پر ان کمیٹیوں کو تحلیل کر دیا گیا ہے۔گوپال اٹالیہ نے کہا کہ آنے والے دنوں میں ہر علاقے اور سماجی اسپیکٹرم کی نمائندگی والی ایک مضبوط ریاستی کمیٹی تشکیل دی جائے گی۔ انہوں نے کہا کہ ہم عآپ کو مہاراشٹر کے دیہی اور شہری کے ہر نکڑ تک لے جانے کی کوشش کریں گے۔انہوں نے کہا کہ آپ مہاراشٹر میں متبادل سیاست کے ساتھ تیزی سے آگے بڑھ رہی ہے۔ میں تمام نوجوانوں، خواتین دانشوروں، سماجی کارکنوں، اہل پیشہ ور افراد اور علاقے کے تمام شہریوں سے درخواست کرتا ہوں کہ وہ عآپ میں شامل ہوں جہاں آپ کا خیرمقدم ہے اور انہیں ہر سطح پر مناسب ذمہ داریاں دی جائیں گی۔ گوپال اٹالیہ نے مہاراشٹر میں زندگی کے تمام شعبوں کے شہریوں سے اپیل کی ہے کہ وہ ریاست میں بدعنوانی سے پاک اور ترقی پر مبنی حکومت فراہم کرنے کے لیے عآپ میں شامل ہوں۔