حج 2023: فارم جمع کرنے کی تاریخ اختتام پذیر، قرعہ اندازی کی تاریخ کا اعلان جلد

نئی دہلی: حج 2023ء کے لیے درخواست جمع کرنے کی آج آخری تاریخ تھی۔ اسی کے ساتھ حج 2023 کے لیے درخواست دینے کا عمل اختتام پذیر ہو گیا۔ حج 2023 کے لیے درخواست دینے کا سلسلہ 10 فروری 2023 سے شروع ہوا تھا، جس کی آخری تاریخ 10 مارچ تھی جوکہ بعد میں بڑھا کر 20 مارچ 2023 کر دی گئی تھی۔ یہ اطلاع دہلی اسٹیٹ حج کمیٹی کی چیئرپرسن کوثر جہاں نے دی۔ امید کی جا رہی ہے کہ اب قرعہ اندازی کی تاریخ کا اعلان جلد کیا جائے گا۔دہلی اسٹیٹ حج کمیٹی کی چیئرپرسن کوثر جہاں نے بتایا کہ آج شام پانچ بجے تک دہلی میں کل 4105 درخواستیں موصول ہوئیں جس میں 70 سال سے زائد عمر کی ریزرو کیٹگری بمع ایک ساتھی 205 درخواستیں موصول ہوئیں اور بنا محرم خواتین کی 49 (45+عمر کی خواتین) درخواستیں موصول ہوئیں۔کوثر جہاں نے کہا کہ کچھ درخواستیں ایسی ہیں جو کسی کاغذی کمی کی وجہ سے التوا میں ہیں۔ ایسے درخواست گزاروں سے رابطہ بھی کیا گیا ہے، لیکن وہ لوگ اپنی درخواست کی کمیوں کو دور نہیں کر رہے ہیں اور نہ ہی دہلی اسٹیٹ حج کمیٹی سے رابطہ کر رہے ہیں۔ اگر ان لوگوں نے فوری طور پر دہلی اسٹیٹ حج کمیٹی سے رابطہ نہیں کیا تو کمپیوٹر پروگرام خود بخود ان کی درخواستوں کو رد کر دے گا۔ انھوں نے یہ بھی جانکاری دی کہ قرعہ اندازی کی تاریخ کا اعلان حج کمیٹی آف انڈیا کی ہدایات آنے کے بعد کیا جائے گا۔